jab dil ki KHalish baDh jati hai majbur jab insan hota hai

jab dil kī ḳhalish baḌh jaatī hai majbūr jab insāñ hotā hai

jiinā jise mushkil ho jaa.e marnā use āsāñ hotā hai

aa.ī thī javānī ham par bhī ham ne bhī bahāreñ dekhī haiñ

is daur se ham bhī guzre haiñ ik ḳhvāb-e-pareshāñ hotā hai

be-kār hai shikva apnoñ kā be-sūd shikāyat ġhairoñ kī

jab vaqt burā aa jaatā hai saaya bhī gurezāñ hotā hai

maiñ un ke sitam sab bhuul gayā mujh ko to karam yaad aate haiñ

vo sar bhī uThā saktā hai kabhī jo banda-e-ehsāñ hotā hai

har-vaqt ulajhte rahte haiñ ye haath kisī ke dāman se

jab hosh mujhe aa jaatā hai merā hī garebāñ hotā hai

har ek ko jaanā paḌtā hai duniyā ke musāfir ḳhāne se

kuchh roz iqāmat hotī hai kuchh roz kā mehmāñ hotā hai

ai zāhid-e-ḳhud-bīñ rahmat-e-haq āġhosh meñ us ko le legī

jo apne gunāhoñ par dil meñ har-vaqt pashemāñ hotā hai

jo dekh rahe haiñ sāhil se ye haal bhalā vo kyā jāneñ

tūfāñ se guzarne vāloñ ko andāza-e-tūfāñ hotā hai

ye ishq-o-vafā kī bāteñ haiñ pūchhe koī 'shañkar' ke dil se

vo sāmne jab aa jaate haiñ har saañs ġhazal-ḳhvāñ hotā hai

jab dil ki KHalish baDh jati hai majbur jab insan hota hai

jina jise mushkil ho jae marna use aasan hota hai

aai thi jawani hum par bhi hum ne bhi bahaaren dekhi hain

is daur se hum bhi guzre hain ek KHwab-e-pareshan hota hai

be-kar hai shikwa apnon ka be-sud shikayat ghairon ki

jab waqt bura aa jata hai saya bhi gurezan hota hai

main un ke sitam sab bhul gaya mujh ko to karam yaad aate hain

wo sar bhi uTha sakta hai kabhi jo banda-e-ehsan hota hai

har-waqt ulajhte rahte hain ye hath kisi ke daman se

jab hosh mujhe aa jata hai mera hi gareban hota hai

har ek ko jaana paDta hai duniya ke musafir KHane se

kuchh roz iqamat hoti hai kuchh roz ka mehman hota hai

ai zahid-e-KHud-bin rahmat-e-haq aaghosh mein us ko le legi

jo apne gunahon par dil mein har-waqt pasheman hota hai

jo dekh rahe hain sahil se ye haal bhala wo kya jaanen

tufan se guzarne walon ko andaza-e-tufan hota hai

ye ishq-o-wafa ki baaten hain puchhe koi 'shankar' ke dil se

wo samne jab aa jate hain har sans ghazal-KHwan hota hai