jab dil ki rahguzar pe tera naqsh-e-pa na tha

jab dil kī rahguzar pe tirā naqsh-e-pā na thā

jiine kī aarzū thī magar hausla na thā

aage harīm-e-ġham se koī rāsta na thā

achchhā huā ki saath kisī ko liyā na thā

dāmān-e-chāk chāk-gulūñ ko bahāna thā

varna nigāh-o-dil meñ koī fāsla na thā

kuchh log sharmsār ḳhudā jaane kyuuñ hue

un se to rūh-e-asr hameñ kuchh gila na thā

jalte rahe ḳhayāl barastī rahī ghaTā

haañ nāz-e-āgahī tujhe kyā kuchh ravā na thā

sunsān dopahar hai baḌā jī udaas hai

kahne ko saath saath hamāre zamāna thā

har aarzū kā naam nahīñ ābrū-e-jāñ

har tishna-lab jamāl-e-ruḳh-e-karbalā na thā

āñdhī meñ barg-e-gul kī zabāñ se 'adā' huā

vo raaz jo kisī se abhī tak kahā na thā

jab dil ki rahguzar pe tera naqsh-e-pa na tha

jine ki aarzu thi magar hausla na tha

aage harim-e-gham se koi rasta na tha

achchha hua ki sath kisi ko liya na tha

daman-e-chaak chaak-gulun ko bahana tha

warna nigah-o-dil mein koi fasla na tha

kuchh log sharmsar KHuda jaane kyun hue

un se to ruh-e-asr hamein kuchh gila na tha

jalte rahe KHayal barasti rahi ghaTa

han naz-e-agahi tujhe kya kuchh rawa na tha

sunsan dopahar hai baDa ji udas hai

kahne ko sath sath hamare zamana tha

har aarzu ka nam nahin aabru-e-jaan

har tishna-lab jamal-e-ruKH-e-karbala na tha

aandhi mein barg-e-gul ki zaban se 'ada' hua

wo raaz jo kisi se abhi tak kaha na tha