jab dil mein kabhi wo mere mehman rahe hain

jab dil meñ kabhī vo mire mehmān rahe haiñ

vīrāne meñ bhī jashn ke sāmān rahe haiñ

aksar ye huā maslahat-e-ishq kī ḳhātir

har baat samajhte hue anjān rahe haiñ

anjām pe nazreñ haiñ magar kuchh nahīñ kahte

ham vaqt kī raftār ko pahchān rahe haiñ

ḳhud maiñ ne bhī chāhā thā jinheñ puure na ho paa.eñ

aise bhī mire dil meñ kuchh armān rahe haiñ

ham un ke taġhāful ko samajhte haiñ ik andāz

ye baat hai jis par vo burā maan rahe haiñ

ta.amīr-e-nasheman ke haiñ andāz bahut ḳhuub

anjām jo honā hai vo ham jaan rahe haiñ

jin saḳht marāhil se guzarnā nahīñ mumkin

ham par vo marāhil bahut āsān rahe haiñ

is darja nazākat to tabī.at meñ nahīñ thī

har baat par ab aap burā maan rahe haiñ

kyā merī ḳhamoshī ne 'qamar' un se kahā hai

tā-der vo mahfil meñ pashemān rahe haiñ

jab dil mein kabhi wo mere mehman rahe hain

virane mein bhi jashn ke saman rahe hain

aksar ye hua maslahat-e-ishq ki KHatir

har baat samajhte hue anjaan rahe hain

anjam pe nazren hain magar kuchh nahin kahte

hum waqt ki raftar ko pahchan rahe hain

KHud main ne bhi chaha tha jinhen pure na ho paen

aise bhi mere dil mein kuchh arman rahe hain

hum un ke taghaful ko samajhte hain ek andaz

ye baat hai jis par wo bura man rahe hain

tamir-e-nasheman ke hain andaz bahut KHub

anjam jo hona hai wo hum jaan rahe hain

jin saKHt marahil se guzarna nahin mumkin

hum par wo marahil bahut aasan rahe hain

is darja nazakat to tabiat mein nahin thi

har baat par ab aap bura man rahe hain

kya meri KHamoshi ne 'qamar' un se kaha hai

ta-der wo mahfil mein pasheman rahe hain