jab dil mein zara bhi aas na ho izhaar-e-tamanna kaun kare

jab dil meñ zarā bhī aas na ho iz.hār-e-tamannā kaun kare

armān kiye dil hī meñ fanā armān ko rusvā kaun kare

ḳhālī hai mirā sāġhar to rahe saaqī ko ishārā kaun kare

ḳhuddārī-e-sā.il bhī to hai kuchh har baar taqāzā kaun kare

jab apnā dil ḳhud le Duube auroñ pe sahārā kaun kare

kashtī pe bharosā jab na rahā tinkoñ pe bharosā kaun kare

ādāb-e-mohabbat meñ bhī ajab do dil milne ko raazī haiñ

lekin ye takalluf haa.il hai pahlā vo ishārā kaun kare

dil terī jafā se TuuT chukā ab chashm-e-karam aa.ī bhī to kyā

phir le ke isī TuuTe dil ko ummīd dobārā kaun kare

jab dil thā shagufta gul kī tarah Tahnī kāñTā sī chubhtī thī

ab ek fasurda dil le kar gulshan kī tamannā kaun kare

basne do nasheman ko apne phir ham bhī kareñge sair-e-chaman

jab tak ki nasheman ujḌā hai phūloñ kā nazārā kaun kare

ik dard hai apne dil meñ bhī ham chup haiñ duniyā nā-vāqif

auroñ kī tarah dohrā dohrā kar us ko fasānā kaun kare

kashtī maujoñ meñ Daalī hai marnā hai yahīñ jiinā hai yahīñ

ab tūfānoñ se ghabrā kar sāhil kā irāda kaun kare

'mullā' kā galā tak baiTh gayā bahrī duniyā ne kuchh na sunā

jab sunñe vaalā ho aisā rah rah ke pukārā kaun kare

jab dil mein zara bhi aas na ho izhaar-e-tamanna kaun kare

arman kiye dil hi mein fana arman ko ruswa kaun kare

KHali hai mera saghar to rahe saqi ko ishaara kaun kare

KHuddari-e-sail bhi to hai kuchh har bar taqaza kaun kare

jab apna dil KHud le Dube auron pe sahaara kaun kare

kashti pe bharosa jab na raha tinkon pe bharosa kaun kare

aadab-e-mohabbat mein bhi ajab do dil milne ko raazi hain

lekin ye takalluf hail hai pahla wo ishaara kaun kare

dil teri jafa se TuT chuka ab chashm-e-karam aai bhi to kya

phir le ke isi TuTe dil ko ummid dobara kaun kare

jab dil tha shagufta gul ki tarah Tahni kanTa si chubhti thi

ab ek fasurda dil le kar gulshan ki tamanna kaun kare

basne do nasheman ko apne phir hum bhi karenge sair-e-chaman

jab tak ki nasheman ujDa hai phulon ka nazara kaun kare

ek dard hai apne dil mein bhi hum chup hain duniya na-waqif

auron ki tarah dohra dohra kar us ko fasana kaun kare

kashti maujon mein Dali hai marna hai yahin jina hai yahin

ab tufanon se ghabra kar sahil ka irada kaun kare

'mulla' ka gala tak baiTh gaya bahri duniya ne kuchh na suna

jab sunne wala ho aisa rah rah ke pukara kaun kare