jab dukhe dil se nikalti hai dua aaKHir-e-shab

jab dukhe dil se nikaltī hai du'ā āḳhir-e-shab

kaañp uThtī hai zamāne kī jafā āḳhir-e-shab

raat bhar tū ne chhupāyā thā tabassum kā jamāl

tere jalvoñ kā hasīñ rang khulā āḳhir-e-shab

shām-e-ġham yuuñ tirī aamad kā tasavvur jaagā

jaise bīmār ko mil jaa.e shifā āḳhir-e-shab

merī āvāz ke saa.e meñ ravāñ thā koī

haa.e kis moḌ pe TuuTī hai sadā āḳhir-e-shab

dard kī raat baḌhī yaad kī qurbat meñ 'adīb'

ban gayā harf-e-tasallī bhī davā āḳhir-e-shab

jab dukhe dil se nikalti hai du'a aaKHir-e-shab

kanp uThti hai zamane ki jafa aaKHir-e-shab

raat bhar tu ne chhupaya tha tabassum ka jamal

tere jalwon ka hasin rang khula aaKHir-e-shab

sham-e-gham yun teri aamad ka tasawwur jaga

jaise bimar ko mil jae shifa aaKHir-e-shab

meri aawaz ke sae mein rawan tha koi

hae kis moD pe TuTi hai sada aaKHir-e-shab

dard ki raat baDhi yaad ki qurbat mein 'adib'

ban gaya harf-e-tasalli bhi dawa aaKHir-e-shab