jab ek bar kisi intiha pe ja Thahre

jab ek baar kisī intihā pe jā Thahre

phir us ke ba.ad nazar rāstoñ meñ kyā Thahre

safar pe nikle the jab zindagī giraft meñ thī

ma.āl-e-kār bas ik mauja-e-havā Thahre

ajab nahīñ hai ki barsoñ ke ghup añdhere meñ

diyā jalā.eñ to manzar hī dūsrā Thahre

chamak uThe kabhī aa kar mirī hathelī par

vahī sitāra kabhī āsmāñ pe jā Thahre

mufāhamat kī nikaltī nahīñ hai raah koī

jab apne apne usūloñ pe baat aa Thahre

ham ek aise dorāhe pe aa chuke haiñ ki ab

qadam baḌhā.e to raste judā judā Thahre

maiñ apne saañs kī gaThrī utaar luuñ sar se

hayāt-e-tez-safar se kaho zarā Thahre

jab ek bar kisi intiha pe ja Thahre

phir us ke baad nazar raston mein kya Thahre

safar pe nikle the jab zindagi giraft mein thi

maal-e-kar bas ek mauja-e-hawa Thahre

ajab nahin hai ki barson ke ghup andhere mein

diya jalaen to manzar hi dusra Thahre

chamak uThe kabhi aa kar meri hatheli par

wahi sitara kabhi aasman pe ja Thahre

mufahamat ki nikalti nahin hai rah koi

jab apne apne usulon pe baat aa Thahre

hum ek aise dorahe pe aa chuke hain ki ab

qadam baDhae to raste juda juda Thahre

main apne sans ki gaThri utar lun sar se

hayat-e-tez-safar se kaho zara Thahre