jab faraaz-e-baam par wo jalwa-gar hota nahin

jab farāz-e-bām par vo jalva-gar hotā nahīñ

koī aalam ho nazar meñ mo'atabar hotā nahīñ

rafta rafta ho rahā hai vo sitamgar mehrbāñ

kaun kahtā hai mohabbat meñ asar hotā nahīñ

be-vafā.ī ne kiyā hai qissa-e-ġham ko tavīl

ab kisī sūrat ye qissa muḳhtasar hotā nahīñ

kab nigāhoñ meñ nahīñ hotā tirī furqat kā ġham

kaun sā aalam hai jab dard-e-jigar hotā nahīñ

shiddat-e-ġham meñ kamī hotī nahīñ rone se kuchh

lashkar-e-ġham āñsuoñ se muntashir hotā nahīñ

ab bhī nazreñ haiñ farāz tuur par paiham magar

haa.e vo jalva ki jo bār-e-digar hotā nahīñ

rāhbar kī sāzishoñ ne vo diye haiñ ġham 'nadīm'

ab kisī sūrat yaqīn-e-rāhbar hotā nahīñ

jab faraaz-e-baam par wo jalwa-gar hota nahin

koi aalam ho nazar mein mo'atabar hota nahin

rafta rafta ho raha hai wo sitamgar mehrban

kaun kahta hai mohabbat mein asar hota nahin

be-wafai ne kiya hai qissa-e-gham ko tawil

ab kisi surat ye qissa muKHtasar hota nahin

kab nigahon mein nahin hota teri furqat ka gham

kaun sa aalam hai jab dard-e-jigar hota nahin

shiddat-e-gham mein kami hoti nahin rone se kuchh

lashkar-e-gham aansuon se muntashir hota nahin

ab bhi nazren hain faraaz tur par paiham magar

hae wo jalwa ki jo bar-e-digar hota nahin

rahbar ki sazishon ne wo diye hain gham 'nadim'

ab kisi surat yaqin-e-rahbar hota nahin