jab gham-e-dost rag-o-pai mein sama jata hai

jab ġham-e-dost rag-o-pai meñ samā jaatā hai

tab kahīñ jā ke duāoñ meñ asar aatā hai

dil mirā jab bhī shab-e-tār se ghabrātā hai

sham.a sī aa ke koī dil meñ jalā jaatā hai

sochtā huuñ ki tirā dard na kho jaa.e kahīñ

ab to har ġham mirī tanhā.ī se Takrātā hai

tum nahīñ vo bhī nahīñ vo bhī nahīñ vo bhī nahīñ

kaun hai phir jo ġharīboñ pe sitam Dhātā hai

dhuup hī Thiik hai is chhāñv se jo gum kar de

kam se kam dhuup meñ saaya to nazar aatā hai

raat ke baad hī aatī hai sahar ai yaaro

ġham jise milte haiñ rāhat bhī vahī paatā hai

log kahte haiñ kabhī pī ke to dekho 'aḳhtar'

garmī-e-mai se har ik dard pighal jaatā hai

jab gham-e-dost rag-o-pai mein sama jata hai

tab kahin ja ke duaon mein asar aata hai

dil mera jab bhi shab-e-tar se ghabraata hai

shama si aa ke koi dil mein jala jata hai

sochta hun ki tera dard na kho jae kahin

ab to har gham meri tanhai se Takraata hai

tum nahin wo bhi nahin wo bhi nahin wo bhi nahin

kaun hai phir jo gharibon pe sitam Dhata hai

dhup hi Thik hai is chhanw se jo gum kar de

kam se kam dhup mein saya to nazar aata hai

raat ke baad hi aati hai sahar ai yaro

gham jise milte hain rahat bhi wahi pata hai

log kahte hain kabhi pi ke to dekho 'aKHtar'

garmi-e-mai se har ek dard pighal jata hai