jab ham-baghal wo sarw qaba posh ho gaya

jab ham-baġhal vo sarv qabā posh ho gayā

qumrī kā tauq halqa-e-āġhosh ho gayā

ash.ār mere sun ke vo ḳhāmosh ho gayā

ġhuncha ba-rañg-e-gul hama-tan-gosh ho gayā

pī ġhair ne sharāb mujhe be-ḳhudī huī

nashsha chaḌhā kisī ko maiñ behosh ho gayā

is darja be-ḳhudī ne dikhā.īñ ta.alliyāñ

gardūñ ġhubār-e-qāfila-e-hosh ho gayā

teġh-e-ajal kī kaaT se Dartā nahīñ huuñ maiñ

zaḳhmoñ se jism-e-zār zira-posh ho gayā

ai but ḳhayāl-e-vasf-e-dahan meñ na paa.ī raah

bhaTkā phirā suḳhan jo maiñ ḳhāmosh ho gayā

ḳhūñ-ḳhvāroñ ke huzūr na aayā hamārī tarah

ā.īna jauharoñ se zira-posh ho gayā

tāle.a jagā.e aap ne arbāb-e-ishq ke

yūsuf kā husn ḳhvāb-e-farāmosh ho gayā

pinhāñ hai zer-e-sabza-e-ḳhat ātish-e-ezār

sho.ala fusūn-e-husn se ḳhas-posh ho gayā

hūreñ gale lipaTtī haiñ aa aa ke raat din

jannat kī raah kūcha-e-āġhosh ho gayā

us mast-e-husn kī nigah-e-garm ke huzūr

ā.īna-e-jām bāda-e-sar-josh ho gayā

be-lutfiyoñ se tum jo mile maiñ ne jaan dī

phāñsī gale meñ halqa-e-āġhosh ho gayā

abr-e-siyah ke saaye ne surma khilā diyā

sabza tamām tūtī-e-ḳhāmosh ho gayā

kāñdhoñ se mere kātib-e-āmāl gir paḌe

taḌpā maiñ is qadar ki subuk-dosh ho gayā

kānoñ kā husn jalva-e-āriz se paḌ gayā

ruḳh āftāb-e-sub.h bunā-gosh ho gayā

uḌtā huuñ ishq meñ lab lālīñ ke ai 'munīr'

goyā sharār ātish-e-ḳhāmosh ho gayā

jab ham-baghal wo sarw qaba posh ho gaya

qumri ka tauq halqa-e-aghosh ho gaya

ashaar mere sun ke wo KHamosh ho gaya

ghuncha ba-rang-e-gul hama-tan-gosh ho gaya

pi ghair ne sharab mujhe be-KHudi hui

nashsha chaDha kisi ko main behosh ho gaya

is darja be-KHudi ne dikhain talliyan

gardun ghubar-e-qafila-e-hosh ho gaya

tegh-e-ajal ki kaT se Darta nahin hun main

zaKHmon se jism-e-zar zira-posh ho gaya

ai but KHayal-e-wasf-e-dahan mein na pai rah

bhaTka phira suKHan jo main KHamosh ho gaya

KHun-KHwaron ke huzur na aaya hamari tarah

aaina jauharon se zira-posh ho gaya

talea jagae aap ne arbab-e-ishq ke

yusuf ka husn KHwab-e-faramosh ho gaya

pinhan hai zer-e-sabza-e-KHat aatish-e-ezar

shoala fusun-e-husn se KHas-posh ho gaya

huren gale lipaTti hain aa aa ke raat din

jannat ki rah kucha-e-aghosh ho gaya

us mast-e-husn ki nigah-e-garm ke huzur

aaina-e-jam baada-e-sar-josh ho gaya

be-lutfiyon se tum jo mile main ne jaan di

phansi gale mein halqa-e-aghosh ho gaya

abr-e-siyah ke saye ne surma khila diya

sabza tamam tuti-e-KHamosh ho gaya

kandhon se mere katib-e-amal gir paDe

taDpa main is qadar ki subuk-dosh ho gaya

kanon ka husn jalwa-e-ariz se paD gaya

ruKH aaftab-e-subh buna-gosh ho gaya

uDta hun ishq mein lab lalin ke ai 'munir'

goya sharar aatish-e-KHamosh ho gaya