jab hum ko taghaful mein kabhi yaad karoge

jab ham ko taġhāful meñ kabhī yaad karoge

ham ḳhuub samajhte haiñ jo bedār karoge

kyā ḳhaak tavaqqo ho pazīrā.ī-e-ġham kī

tum ḳhaak ilāj-e-dil-e-nāshād karoge

vo ham ki giraftār-e-taġhāful hī raheñge

vo tum ho ki bhūle se kabhī yaad karoge

ye rasm-o-rah-e-nāzish-e-bejā na miTegī

kuchh taaza sitam aur bhī ījād karoge

kyā kījiye is dil kī tasallī ko vagarna

tum aur ġham-e-sheva-e-farhād karoge

vallāh ajab kyā jo ba-īñ-tarz-e-taġhāful

tum kār-e-sitam-rānī-e-jallād karoge

lekin ye rahe yaad ki jab ham hī na hoñge

rah rah ke hameñ yaad bahut yaad karoge

takte hī rahoge dar-o-dīvār ko pahroñ

kho jāoge jo lab se kuchh irshād karoge

kyā jāniye kyā kyā na guzar jā.egī dil par

kuchh bhūlī huī bātoñ ko jab yaad karoge

baḌh jā.egī jab had se sivā shorish-e-jazbāt

ḳhud ārzū-e-nashtar-e-fassād karoge

ārā.ish-e-kākul kā bhalā hosh rahegā

jo rashk-e-ḳham-e-turra-e-shamshād karoge

DhūñDoge bahut ham ko magar ham na mileñge

taḌpoge bahut ro.o.ge fariyād karoge

vo sham-e-mohabbat na jalī hai na jalegī

raushan jo sar-e-rah-guzar-e-yād karoge

andesha-e-rusvā.ī se ab aur kahāñ tak

tash.hīr-e-ġham-e-ishq ḳhudā-dād karoge

mauhūm sī ik aas pe jiite haiñ abhī tak

ya.anī ki kisī roz to tum yaad karoge

'ahmar' se bahar-taur tumheñ rabt rahā hai

'ahmar' hī ko bhūle to kise yaad karoge

jab hum ko taghaful mein kabhi yaad karoge

hum KHub samajhte hain jo bedar karoge

kya KHak tawaqqo ho pazirai-e-gham ki

tum KHak ilaj-e-dil-e-nashad karoge

wo hum ki giraftar-e-taghaful hi rahenge

wo tum ho ki bhule se kabhi yaad karoge

ye rasm-o-rah-e-nazish-e-beja na miTegi

kuchh taza sitam aur bhi ijad karoge

kya kijiye is dil ki tasalli ko wagarna

tum aur gham-e-shewa-e-farhad karoge

wallah ajab kya jo ba-in-tarz-e-taghaful

tum kar-e-sitam-rani-e-jallad karoge

lekin ye rahe yaad ki jab hum hi na honge

rah rah ke hamein yaad bahut yaad karoge

takte hi rahoge dar-o-diwar ko pahron

kho jaoge jo lab se kuchh irshad karoge

kya jaaniye kya kya na guzar jaegi dil par

kuchh bhuli hui baaton ko jab yaad karoge

baDh jaegi jab had se siwa shorish-e-jazbaat

KHud aarzu-e-nashtar-e-fassad karoge

aaraish-e-kakul ka bhala hosh rahega

jo rashk-e-KHam-e-turra-e-shamshad karoge

DhunDoge bahut hum ko magar hum na milenge

taDpoge bahut rooge fariyaad karoge

wo sham-e-mohabbat na jali hai na jalegi

raushan jo sar-e-rah-guzar-e-yaad karoge

andesha-e-ruswai se ab aur kahan tak

tashhir-e-gham-e-ishq KHuda-dad karoge

mauhum si ek aas pe jite hain abhi tak

yani ki kisi roz to tum yaad karoge

'ahmar' se bahar-taur tumhein rabt raha hai

'ahmar' hi ko bhule to kise yaad karoge