جب ہم اس سے مل کر آیا کرتے تھے

جب ہم اس سے مل کر آیا کرتے تھے

سارا دن ساحر کو گایا کرتے تھے

جب جب دکھ کے بادل چھایا کرتے تھے

ہم پیڑوں سے ملنے جایا کرتے تھے

ہم مل کر سیلاب بناتے تھے پہلے

پھر ہم دونوں ناؤ بنایا کرتے تھے

چھوٹی بات پہ کھل اٹھتے تھے بچوں سا

پنجرے سے پنچھی کو اڑایا کرتے تھے

دیواروں دروازوں اور دریچوں کو

سب کو اس کی بات بتایا کرتے تھے

راتیں کٹ جاتی تھیں جسے بنانے میں

دن میں وہ تصویر چھپایا کرتے تھے

خاموشی جب بھی ضائع ہو جاتی تھی

صحرا میں جا کر چلایا کرتے تھے