jab hamein izn tamasha hoga

jab hameñ izn tamāshā hogā

tū kahāñ anjuman-ārā hogā

ham na pahuñche sar-e-manzil to kyā

ham-safar koī to pahuñchā hogā

uḌtī hogī kahīñ ḳhushbū-e-ḳhayāl

gul-e-ma.anī kahīñ khiltā hogā

har gul-o-barg hai ik naqsh-e-qadam

kaun is raah se guzrā hogā

lab-e-tasvīr pe goyā hai suḳhan

koī sun le to tamāshā hogā

ab bhī gul-posh darīche ke qarīb

tū kisī soch meñ Duubā hogā

aaj kī shaam bhī vo sarv-e-jamīl

tere āñgan meñ lahaktā hogā

tū ne jab haath chhuḌāyā thā vo pal

tujh ko bhī yaad to aatā hogā

dil ye kahtā hai tujhī se miliye

maiñ ye kahtā huuñ ki phir kyā hogā

dasht-e-furqat meñ khaḌā sochtā huuñ

tū kahāñ anjuman-ārā hogā

jab hamein izn tamasha hoga

tu kahan anjuman-ara hoga

hum na pahunche sar-e-manzil to kya

ham-safar koi to pahuncha hoga

uDti hogi kahin KHushbu-e-KHayal

gul-e-mani kahin khilta hoga

har gul-o-barg hai ek naqsh-e-qadam

kaun is rah se guzra hoga

lab-e-taswir pe goya hai suKHan

koi sun le to tamasha hoga

ab bhi gul-posh dariche ke qarib

tu kisi soch mein Duba hoga

aaj ki sham bhi wo sarw-e-jamil

tere aangan mein lahakta hoga

tu ne jab hath chhuDaya tha wo pal

tujh ko bhi yaad to aata hoga

dil ye kahta hai tujhi se miliye

main ye kahta hun ki phir kya hoga

dasht-e-furqat mein khaDa sochta hun

tu kahan anjuman-ara hoga