jab haq dil-o-dimagh mein bharpur rach gaya

jab haq dil-o-dimāġh meñ bharpūr rach gayā

mere qadam jahāñ paḌe kohrām mach gayā

har baar us se quvvat-e-iz.hār chhin gayā

jab bhī maiñ us kī bazm meñ le kar pahuñch gayā

maiñ ne to apne dar pe likhāyā thā apnā naam

lekin koī paḌosī use bhī khurach gayā

dariyā kī tah chaTān kī zad ko bhī sah ga.ī

lekin ye kyā ki sat.h pe ik shor mach gayā

kal raat un ġharīboñ ko qai kyuuñ na aa sakī

khānā amīr-e-shahr kā kyuuñ un ko pach gayā

'aslam' karāmatoñ meñ karūñgā shumār agar

merā ḳhulūs tohmat-e-yārāñ se bach gayā

jab haq dil-o-dimagh mein bharpur rach gaya

mere qadam jahan paDe kohram mach gaya

har bar us se quwwat-e-izhaar chhin gaya

jab bhi main us ki bazm mein le kar pahunch gaya

main ne to apne dar pe likhaya tha apna nam

lekin koi paDosi use bhi khurach gaya

dariya ki tah chaTan ki zad ko bhi sah gai

lekin ye kya ki sath pe ek shor mach gaya

kal raat un gharibon ko qai kyun na aa saki

khana amir-e-shahr ka kyun un ko pach gaya

'aslam' karamaton mein karunga shumar agar

mera KHulus tohmat-e-yaran se bach gaya