jab hue KHwab mein visal hue

jab hue ḳhvāb meñ visāl hue

tum ko dekhe to māh-o-sāl hue

ham tumheñ bhuul kar bhī yaad kareñ

kis qadar sāhab-e-kamāl hue

ho ga.e apnī zaat meñ yaktā

be-misālī kī ik misāl hue

apnī ḳhāmoshiyoñ ke hujre meñ

shor kartā huā dhamāl hue

lutf lene ko un kī hairat kā

ham bhī ā.īna-e-jamāl hue

lamha-e-vasl to guzar hī gayā

haañ magar roz-o-shab vabāl hue

un ko dīvān se nikāl diyā

sher jo apne hasb-e-hāl hue

jab hue KHwab mein visal hue

tum ko dekhe to mah-o-sal hue

hum tumhein bhul kar bhi yaad karen

kis qadar sahab-e-kamal hue

ho gae apni zat mein yakta

be-misali ki ek misal hue

apni KHamoshiyon ke hujre mein

shor karta hua dhamal hue

lutf lene ko un ki hairat ka

hum bhi aaina-e-jamal hue

lamha-e-wasl to guzar hi gaya

han magar roz-o-shab wabaal hue

un ko diwan se nikal diya

sher jo apne hasb-e-haal hue