jab ibtida charagh thi jab intiha charagh

jab ibtidā charāġh thī jab intihā charāġh

mahfil ke iḳhtitām pe phir kyā huā charāġh

tū hī batā ki anjuman-ārā.ī kyā huī

is anjuman meñ tū bhī to jaltā rahā charāġh

mere qarīb aa ke bhī itnā gurez kyuuñ

mere nadīm thā kabhī maiñ bhī tirā charāġh

phir us ke baad hairat-e-vahm-o-gumān thī

jab ban gayā vajūd meñ ik aa.ina charāġh

guzrī jo mujh pe guzrī mirī baat aur hai

lekin jo tujh pe guzrī mujhe vo sunā charāġh

manzar hai raat kā hī tire canvas pe kyuuñ

jugnū banā shajar kabhī patte banā charāġh

chaupāl kī kahānī ke kirdār kyā hue

shab ḳhatm ho ga.ī hai so bujhne lagā charāġh

'ahmad' bas ek raat meñ qissa tamām shud

maiñ thā fasīl-e-shām pe jaltā huā charāġh

jab ibtida charagh thi jab intiha charagh

mahfil ke iKHtitam pe phir kya hua charagh

tu hi bata ki anjuman-arai kya hui

is anjuman mein tu bhi to jalta raha charagh

mere qarib aa ke bhi itna gurez kyun

mere nadim tha kabhi main bhi tera charagh

phir us ke baad hairat-e-wahm-o-guman thi

jab ban gaya wajud mein ek aaina charagh

guzri jo mujh pe guzri meri baat aur hai

lekin jo tujh pe guzri mujhe wo suna charagh

manzar hai raat ka hi tere canwas pe kyun

jugnu bana shajar kabhi patte bana charagh

chaupal ki kahani ke kirdar kya hue

shab KHatm ho gai hai so bujhne laga charagh

'ahmad' bas ek raat mein qissa tamam shud

main tha fasil-e-sham pe jalta hua charagh