jab ek charagh-e-rahguzar ki kiran paDe

jab ik charāġh-e-rāhguzar kī kiran paḌe

hoñToñ kī lau latīf hijāboñ se chhan paḌe

shāḳh-e-abad se jhaḌte zamānoñ kā ruup hai

ye log jin ke ruḳh pe gumān-e-chaman paḌe

ye kis hasīñ dayār kī ThanDī havā chalī

har mauja-e-ḳhayāl pe sad-hā shikan paḌe

ye kaun hai laboñ meñ rasīlī ruteñ ghulīñ

palkoñ kī oT niiñd meñ gul-gūñ gagan paḌe

ik pal bhī kū-e-dil meñ na Thahrāo rah-navard

ab jis ke naqsh-e-pā meñ chaman-dar-chaman paḌe

ik jast is taraf bhī ġhazāl-e-zamāna-raqs

rah terī dekhte haiñ ḳhatā o ḳhutan paḌe

jab anjuman tavajjoh-e-sad-guftugū meñ ho

merī taraf bhī ik nigah-e-kam-suḳhan paḌe

sahrā-e-zindagī meñ jidhar bhī qadam uThe

raste meñ ek ārzūoñ kā chaman paḌe

is jaltī dhuup meñ ye ghane sāya-dār peḌ

maiñ apnī zindagī unheñ de duuñ jo ban paḌe

ai shātir-e-azal tire hāthoñ ko chuum luuñ

qarye meñ mere naam jo dīvāna-pan paḌe

ai sub.h-e-der-ḳhez unheñ āvāz de jo hai

ik shām-e-zūd-ḳhvāb ke sukh meñ magan paḌe

'amjad' tarīq-mai meñ hai ye ehtiyāt shart

ik daaġh bhī kahīñ na sar-e-pairahan paḌe

jab ek charagh-e-rahguzar ki kiran paDe

honTon ki lau latif hijabon se chhan paDe

shaKH-e-abad se jhaDte zamanon ka rup hai

ye log jin ke ruKH pe guman-e-chaman paDe

ye kis hasin dayar ki ThanDi hawa chali

har mauja-e-KHayal pe sad-ha shikan paDe

ye kaun hai labon mein rasili ruten ghulin

palkon ki oT nind mein gul-gun gagan paDe

ek pal bhi ku-e-dil mein na Thahrao rah-naward

ab jis ke naqsh-e-pa mein chaman-dar-chaman paDe

ek jast is taraf bhi ghazal-e-zamana-raqs

rah teri dekhte hain KHata o KHutan paDe

jab anjuman tawajjoh-e-sad-guftugu mein ho

meri taraf bhi ek nigah-e-kam-suKHan paDe

sahra-e-zindagi mein jidhar bhi qadam uThe

raste mein ek aarzuon ka chaman paDe

is jalti dhup mein ye ghane saya-dar peD

main apni zindagi unhen de dun jo ban paDe

ai shatir-e-azal tere hathon ko chum lun

qarye mein mere nam jo diwana-pan paDe

ai subh-e-der-KHez unhen aawaz de jo hai

ek sham-e-zud-KHwab ke sukh mein magan paDe

'amjad' tariq-mai mein hai ye ehtiyat shart

ek dagh bhi kahin na sar-e-pairahan paDe