jab jab main zindagi ki pareshaniyon mein tha

jab jab maiñ zindagī kī pareshāniyoñ meñ thā

apnoñ ke bāvajūd bhī tanhā.iyoñ meñ thā

ābādiyoñ ne saare bharam hī miTā diye

is se ziyāda ḳhush to maiñ vīrāniyoñ meñ thā

sāhil pe jo khaḌe the unheñ mauj le ga.ī

maiñ bach gayā kī yaar maiñ tuġhyāniyoñ meñ thā

āsāniyoñ meñ ziist hī be-kaif ho ga.ī

jiine kā asl lutf to dushvāriyoñ meñ thā

kartā bhī kyā kisī se shifā kī koī umiid

saarā kā saarā shahr hī bīmāriyoñ meñ thā

jo sāda-lauh the vo nasīboñ meñ rah ga.e

chālāk jo bhī shaḳhs thā achchhā.iyoñ meñ thā

kuchh aap hī ne ġhaur se Daalī nahīñ nazar

merā bhī naam aap ke shaidā.iyoñ meñ thā

bāteñ to sattā par yuuñ bahut sī huiiñ magar

merā dimāġh jhiil kī gahrā.iyoñ meñ thā

'nāyāb'-bhā.ī ban ke gale jo milā thā kal

us shaḳhs kā shumār bhī dañgā.iyoñ meñ thā

jab jab main zindagi ki pareshaniyon mein tha

apnon ke bawajud bhi tanhaiyon mein tha

aabaadiyon ne sare bharam hi miTa diye

is se ziyaada KHush to main viraniyon mein tha

sahil pe jo khaDe the unhen mauj le gai

main bach gaya ki yar main tughyaniyon mein tha

aasaniyon mein zist hi be-kaif ho gai

jine ka asl lutf to dushwariyon mein tha

karta bhi kya kisi se shifa ki koi umid

sara ka sara shahr hi bimariyon mein tha

jo sada-lauh the wo nasibon mein rah gae

chaalak jo bhi shaKHs tha achchhaiyon mein tha

kuchh aap hi ne ghaur se Dali nahin nazar

mera bhi nam aap ke shaidaiyon mein tha

baaten to satta par yun bahut si huin magar

mera dimagh jhil ki gahraiyon mein tha

'nayab'-bhai ban ke gale jo mila tha kal

us shaKHs ka shumar bhi dangaiyon mein tha