jab josh-e-bahaaran tha un chandni raaton mein

jab josh-e-bahārāñ thā un chāñdnī rātoñ meñ

har zarra gulistāñ thā un chāñdnī rātoñ meñ

jab apnī adāoñ se ik zohra-jabīñ paikar

ġhārat-gar-e-īmāñ thā un chāñdnī rātoñ meñ

jannat thī bahut dilkash shādāb nazāroñ kī

har lamha rag-e-jāñ thā un chāñdnī rātoñ meñ

jab sarv kī saf kā vo mehrāb-numā saaya

tasvīr-e-shabistāñ thā un chāñdnī rātoñ meñ

jab phuul sā vo chehra us jān-e-bahārāñ kā

taqdīs kā unvāñ thā un chāñdnī rātoñ meñ

jab vaqt damaktī sī shāḳhoñ pe sanobar kī

ik dīda-e-hairāñ thā un chāñdnī rātoñ meñ

bhīgī huī āñkhoñ kā mauhūm ishārā bhī

ik ḳhuld-badāmāñ thā un chāñdnī rātoñ meñ

e.ajāz-e-mohabbat thā allāh kī rahmat thī

qismat pe maiñ nāzāñ thā un chāñdnī rātoñ meñ

muddat se nahīñ dekhā us husn-e-gulābī ko

shā.ir kā jo mehmāñ thā un chāñdnī rātoñ meñ

jab josh-e-bahaaran tha un chandni raaton mein

har zarra gulistan tha un chandni raaton mein

jab apni adaon se ek zohra-jabin paikar

ghaarat-gar-e-iman tha un chandni raaton mein

jannat thi bahut dilkash shadab nazaron ki

har lamha rag-e-jaan tha un chandni raaton mein

jab sarw ki saf ka wo mehrab-numa saya

taswir-e-shabistan tha un chandni raaton mein

jab phul sa wo chehra us jaan-e-bahaaran ka

taqdis ka unwan tha un chandni raaton mein

jab waqt damakti si shaKHon pe sanobar ki

ek dida-e-hairan tha un chandni raaton mein

bhigi hui aankhon ka mauhum ishaara bhi

ek KHuld-badaman tha un chandni raaton mein

eajaz-e-mohabbat tha allah ki rahmat thi

qismat pe main nazan tha un chandni raaton mein

muddat se nahin dekha us husn-e-gulabi ko

shair ka jo mehman tha un chandni raaton mein