jab kabhi apni tamannaon ka gulshan dekha

jab kabhī apnī tamannāoñ kā gulshan dekhā

maiñ ne dil-soz zamāne ko bhī dushman dekhā

apne baare meñ ġhalat-fahmī huī hai jab bhī

maiñ ne har baar purānā koī darpan dekhā

is qadar khoyā huā thā maiñ tirī yādoñ meñ

sahrā dekhā na kabhī raah meñ gulshan dekhā

kaifiyat dil kī bayāñ kartī thiiñ āñkheñ sab kī

maiñ ne har shaḳhs kā bhīgā huā dāman dekhā

dushmanī meñ bhī mohabbat se vo pesh aatā hai

us ke jaisā na koī dost na dushman dekhā

ho gayā us kī maiñ 'azmat kā jahāñ meñ qaa.il

jab kahīñ bhī kisī daanā ko firotan dekhā

terā shaidā.ī huuñ maiñ roz-e-azal se 'sāhil'

zindagī tujh ko har ik daur meñ ahsan dekhā

jab kabhi apni tamannaon ka gulshan dekha

main ne dil-soz zamane ko bhi dushman dekha

apne bare mein ghalat-fahmi hui hai jab bhi

main ne har bar purana koi darpan dekha

is qadar khoya hua tha main teri yaadon mein

sahra dekha na kabhi rah mein gulshan dekha

kaifiyat dil ki bayan karti thin aankhen sab ki

main ne har shaKHs ka bhiga hua daman dekha

dushmani mein bhi mohabbat se wo pesh aata hai

us ke jaisa na koi dost na dushman dekha

ho gaya us ki main 'azmat ka jahan mein qail

jab kahin bhi kisi dana ko firotan dekha

tera shaidai hun main roz-e-azal se 'sahil'

zindagi tujh ko har ek daur mein ahsan dekha