jab kabhi fasl-e-bahaaran ka KHayal aata hai

jab kabhī fasl-e-bahārāñ kā ḳhayāl aatā hai

saath hī chāk-e-garebāñ kā ḳhayāl aatā hai

jab bhī be-sāḳhta zanjīr pa jaatī hai nazar

aap kī zulf-e-pareshāñ kā ḳhayāl aatā hai

yaad aa jaatī hai kashtī kī tabāhī mujh ko

kaañp uThtā huuñ jo tūfāñ kā ḳhayāl aatā hai

ābla-pā.ī kī taklīf kā ehsās nahiñ

zahmat-e-ḳhār-e-muġhīlāñ kā ḳhayāl aatā hai

maiñ tire diin se māyūs nahīñ huuñ lekin

apnī kotāhī-e-dāmāñ kā ḳhayāl aatā hai

mujh ko ma.alūm haiñ sab gardish-e-daurāñ ke hudūd

kyoñ mujhe gardish-e-daurāñ kā ḳhayāl aatā hai

dard nā-qābil-e-darmāñ sahī lekin ai dost

dard uThtā hai to darmāñ kā ḳhayāl aatā hai

merā honā bhī na hone ke barābar hai 'sa.īd'

kis ko ik be-sar-o-sāmāñ kā ḳhayāl aatā hai

jab kabhi fasl-e-bahaaran ka KHayal aata hai

sath hi chaak-e-gareban ka KHayal aata hai

jab bhi be-saKHta zanjir pa jati hai nazar

aap ki zulf-e-pareshan ka KHayal aata hai

yaad aa jati hai kashti ki tabahi mujh ko

kanp uThta hun jo tufan ka KHayal aata hai

aabla-pai ki taklif ka ehsas nahin

zahmat-e-KHar-e-mughilan ka KHayal aata hai

main tere din se mayus nahin hun lekin

apni kotahi-e-daman ka KHayal aata hai

mujh ko malum hain sab gardish-e-dauran ke hudud

kyon mujhe gardish-e-dauran ka KHayal aata hai

dard na-qabil-e-darman sahi lekin ai dost

dard uThta hai to darman ka KHayal aata hai

mera hona bhi na hone ke barabar hai 'said'

kis ko ek be-sar-o-saman ka KHayal aata hai