جب کبھی خون میں ٹھہراؤ سا آ جاتا ہے

جب کبھی خون میں ٹھہراؤ سا آ جاتا ہے

جذبۂ دل کو مرے تاؤ سا آ جاتا ہے

شاخ سے ٹوٹتے پتوں کا نظارہ کر کے

میرے اندر کہیں بکھراؤ سا آ جاتا ہے

سونا چاندی ہوں کہ پتھر ہو کہ انسان کوئی

میں جسے چاہوں اسے بھاؤ سا آ جاتا ہے

تم سے ملتا ہوں تو جینے کی للک جاگتی ہے

سوچ میں فکر میں پھیلاؤ سا آ جاتا ہے

رہنما ان کو کہوں فکر میں جن کی ہر دم

موسموں کی طرح بدلاؤ سا آ جاتا ہے

چوٹ پڑتی ہے کسی جسم پہ جب بھی مشتاقؔ

کیوں بدن پر مرے اک گھاؤ سا آ جاتا ہے