jab kabhi madd-e-muqabil wo ruKH-e-zeba hua

jab kabhī madd-e-muqābil vo ruḳh-e-zebā huā

ā.īna bhī rah gayā hairat se muñh taktā huā

fasl-e-gul meñ hai shikast-o-reḳht kā ā.īna-dār

ek ik tinkā nasheman kā mire bikhrā huā

mahv-e-hairat huuñ ḳharāsh-e-dast-e-ġham ko dekh kar

zaḳhm chehre par haiñ yā hai ā.īna TuuTā huā

abr-e-ġham barse to ashkoñ kī ravānī dekhnā

sāhil-e-mizhgāñ pe hai tūfāñ abhī Thahrā huā

iḳhtilāf-e-zehn-e-fitrat zindagānī kā sarāb

ishtirāk-e-bāhamī hī maujib-e-dariyā huā

jab maiñ un se kah chukā apnī hadīs-e-ranj-o-ġham

un kī shoḳhī dekhiye kahne lage par kyā huā

maiñ samajh paayā na 'ājiz' ye tilism-e-rāhbar

har qadam par manzil-e-maqsūd kā dhokā huā

jab kabhi madd-e-muqabil wo ruKH-e-zeba hua

aaina bhi rah gaya hairat se munh takta hua

fasl-e-gul mein hai shikast-o-reKHt ka aaina-dar

ek ek tinka nasheman ka mere bikhra hua

mahw-e-hairat hun KHarash-e-dast-e-gham ko dekh kar

zaKHm chehre par hain ya hai aaina TuTa hua

abr-e-gham barse to ashkon ki rawani dekhna

sahil-e-mizhgan pe hai tufan abhi Thahra hua

iKHtilaf-e-zehn-e-fitrat zindagani ka sarab

ishtirak-e-bahami hi maujib-e-dariya hua

jab main un se kah chuka apni hadis-e-ranj-o-gham

un ki shoKHi dekhiye kahne lage par kya hua

main samajh paya na 'ajiz' ye tilism-e-rahbar

har qadam par manzil-e-maqsud ka dhoka hua