jab kabhi phulon ne KHushbu ki tijarat ki hai

jab kabhī phūloñ ne ḳhushbū kī tijārat kī hai

pattī pattī ne havāoñ se shikāyat kī hai

yuuñ lagā jaise koī itr fazā meñ ghul jaa.e

jab kisī bachche ne qur.āñ kī tilāvat kī hai

jā-namāzoñ kī tarah nuur meñ ujlā.ī sahar

raat bhar jaise farishtoñ ne ibādat kī hai

sar uThā.e thiiñ bahut surḳh havā meñ phir bhī

ham ne palkoñ ke charāġhoñ kī hifāzat kī hai

mujhe tūfān-e-havādis se Darāne vaalo

hādsoñ ne to mire haath pe bai.at kī hai

aaj ik dāna-e-gandum ke bhī haqdār nahīñ

ham ne sadiyoñ inhīñ khetoñ pe hukūmat kī hai

ye zarūrī thā ki ham dekhte qiloñ ke jalāl

umr bhar ham ne mazāroñ kī ziyārat kī hai

jab kabhi phulon ne KHushbu ki tijarat ki hai

patti patti ne hawaon se shikayat ki hai

yun laga jaise koi itr faza mein ghul jae

jab kisi bachche ne quran ki tilawat ki hai

ja-namazon ki tarah nur mein ujlai sahar

raat bhar jaise farishton ne ibaadat ki hai

sar uThae thin bahut surKH hawa mein phir bhi

hum ne palkon ke charaghon ki hifazat ki hai

mujhe tufan-e-hawadis se Darane walo

hadson ne to mere hath pe baiat ki hai

aaj ek dana-e-gandum ke bhi haqdar nahin

hum ne sadiyon inhin kheton pe hukumat ki hai

ye zaruri tha ki hum dekhte qilon ke jalal

umr bhar hum ne mazaron ki ziyarat ki hai