jab kabhi qafila-e-abr rawan hota hai

jab kabhī qāfila-e-abr ravāñ hotā hai

shāḳh-dar-shāḳh ik ehsās javāñ hotā hai

bū-e-gul mauj-e-sabā se ye kahe hai dekho

kaun ab ham-safar-e-umr-e-ravāñ hotā hai

ye tasavvur jo sahārā hai mire jiine kā

ye tasavvur bhī kisī vaqt garāñ hotā hai

din rahe chāhe pighalne lage sūraj se badan

raat par to kisī qātil kā gumāñ hotā hai

kitne lamhe haiñ jo be-chehra chale jaate haiñ

sochne vaale ko ehsās kahāñ hotā hai

koī āñdhī ki bujhā de ye charāġhoñ kī qatār

zehn meñ jalte haiñ aur ghar meñ dhuāñ hotā hai

ab na lahje meñ vo garmī na vo āñkhoñ meñ chamak

koī aise meñ bhalā dushman-e-jāñ hotā hai

jab kabhi qafila-e-abr rawan hota hai

shaKH-dar-shaKH ek ehsas jawan hota hai

bu-e-gul mauj-e-saba se ye kahe hai dekho

kaun ab ham-safar-e-umr-e-rawan hota hai

ye tasawwur jo sahaara hai mere jine ka

ye tasawwur bhi kisi waqt garan hota hai

din rahe chahe pighalne lage suraj se badan

raat par to kisi qatil ka guman hota hai

kitne lamhe hain jo be-chehra chale jate hain

sochne wale ko ehsas kahan hota hai

koi aandhi ki bujha de ye charaghon ki qatar

zehn mein jalte hain aur ghar mein dhuan hota hai

ab na lahje mein wo garmi na wo aankhon mein chamak

koi aise mein bhala dushman-e-jaan hota hai