jab kabhi rasm-o-rah-e-‘am sada deti hai

jab kabhī rasm-o-rah-e-‘ām sadā detī hai

dil ko kyā kyā havas-e-nām sadā detī hai

mash.aleñ apnī sa.mbhālo ki fazā.eñ chamkeñ

itnī jaatī huī har shaam sadā detī hai

kyā zamāne meñ koī sāhib-e-dānish na rahā

zindagī ham ko bahar-gām sadā detī hai

hai yahī vaqt ki qadmoñ ko ham-āhang karo

phir kahāñ gardish-e-ayyām sadā detī hai

zā.icha mere ḳhayāloñ kā judā sab se alag

kis ko ham-peshgī-e-‘ām sadā detī hai

parda-e-sang nahīñ parda-e-iz.hār-e-jamāl

rūh-e-ḳhvābīda-e-asnām sadā detī hai

ik yaqīñ aur pas-e-marg yaqīñ ubhregā

har shikast-e-dil-e-nākām sadā detī hai

har gumāñ-zād dhuñdalke se guzar jaao 'urūj'

raushnī sī vo lab-e-bām sadā detī hai

jab kabhi rasm-o-rah-e-‘am sada deti hai

dil ko kya kya hawas-e-nam sada deti hai

mashalen apni sambhaalo ki fazaen chamken

itni jati hui har sham sada deti hai

kya zamane mein koi sahib-e-danish na raha

zindagi hum ko bahar-gam sada deti hai

hai yahi waqt ki qadmon ko ham-ahang karo

phir kahan gardish-e-ayyam sada deti hai

zaicha mere KHayalon ka juda sab se alag

kis ko ham-peshgi-e-‘am sada deti hai

parda-e-sang nahin parda-e-izhaar-e-jamal

ruh-e-KHwabida-e-asnam sada deti hai

ek yaqin aur pas-e-marg yaqin ubhrega

har shikast-e-dil-e-nakaam sada deti hai

har guman-zad dhundalke se guzar jao 'uruj'

raushni si wo lab-e-baam sada deti hai