jab kaha maine ki mar mar ke bache hijr mein hum

jab kahā maiñ ne ki mar mar ke bache hijr meñ ham

hañs ke bole tumheñ jiinā thā to mar kyuuñ na ga.e

ham to allāh ke ghar jā ke bahut pachhtā.e

jaan denī thī to kāfir tire ghar kyuuñ na ga.e

sū-e-dozaḳh but-e-kāfir ko jo jaate dekhā

ham ne jannat se kahā haa.e udhar kyuuñ na ga.e

pahle us soch meñ marte the ki jiite kyuuñ haiñ

ab ham is fikr meñ jiite haiñ ki mar kyuuñ na ga.e

zāhido kyā sū-e-mashriq nahīñ allāh kā ghar

ka.abe jaanā thā to tum log udhar kyuuñ na ga.e

tū ne āñkheñ to mujhe dekh ke nīchī kar liiñ

mere dushman tirī nazroñ se utar kyuuñ na ga.e

sun ke bole vo mirā hāl-e-judā.ī 'muztar'

jab ye hālat thī to phir jī se guzar kyuuñ na ga.e

jab kaha main ne ki mar mar ke bache hijr mein hum

hans ke bole tumhein jina tha to mar kyun na gae

hum to allah ke ghar ja ke bahut pachhtae

jaan deni thi to kafir tere ghar kyun na gae

su-e-dozaKH but-e-kafir ko jo jate dekha

hum ne jannat se kaha hae udhar kyun na gae

pahle us soch mein marte the ki jite kyun hain

ab hum is fikr mein jite hain ki mar kyun na gae

zahido kya su-e-mashriq nahin allah ka ghar

kabe jaana tha to tum log udhar kyun na gae

tu ne aankhen to mujhe dekh ke nichi kar lin

mere dushman teri nazron se utar kyun na gae

sun ke bole wo mera haal-e-judai 'muztar'

jab ye haalat thi to phir ji se guzar kyun na gae