jab kaho kyun ho KHafa kya bais

jab kaho kyuuñ ho ḳhafā kyā baa.is

kahte haiñ pūchhne kā kyā baa.is

bholī sūrat kī hai ḳhūbī varna

ho adū dost-numā kyā baa.is

maiñ ne kī aah to bole nāgāh

ho ga.e garm huā kyā baa.is

aatā hai dekh ke anjum ko ḳhayāl

hai falak ābla-pā kiyā baa.is

va.ada karne kī zarūrat kyā thī

phir na aane kā bhalā kyā baa.is

gar na thī hijr meñ ummīd-e-visāl

jiite rahne kā huā kyā baa.is

dam nikaltā hai mirā ruk ruk kar

kunad hai teġh-e-qazā kyā baa.is

chashma-e-ḳhizr meñ mai hī be-shak

aab ho umr-fazā kyā baa.is

tum karo tark-e-jafā kyā imkān

ham kareñ tark-e-vafā kiyā baa.is

naala kartā nahīñ 'nāzim' tāsīr

tiir hotā hai ḳhatā kyā baa.is

jab kaho kyun ho KHafa kya bais

kahte hain puchhne ka kya bais

bholi surat ki hai KHubi warna

ho adu dost-numa kya bais

main ne ki aah to bole nagah

ho gae garm hua kya bais

aata hai dekh ke anjum ko KHayal

hai falak aabla-pa kiya bais

wada karne ki zarurat kya thi

phir na aane ka bhala kya bais

gar na thi hijr mein ummid-e-visal

jite rahne ka hua kya bais

dam nikalta hai mera ruk ruk kar

kunad hai tegh-e-qaza kya bais

chashma-e-KHizr mein mai hi be-shak

aab ho umr-faza kya bais

tum karo tark-e-jafa kya imkan

hum karen tark-e-wafa kiya bais

nala karta nahin 'nazim' tasir

tir hota hai KHata kya bais