جب کلی کوئی مسکراتی ہے

جب کلی کوئی مسکراتی ہے

جانے کیوں تیری یاد آتی ہے

سر پٹکتی ہیں موجیں ساحل پر

جب مری ناؤ ڈگمگاتی ہے

تو ہے یا تیری یاد ہے اے دوست

کوئی شے دل کو گدگداتی ہے

ان سے کیا کہئے مدعا دل کا

بات کہنے سے بات جاتی ہے

میرے ساز حیات پر ہر دم

موت میٹھے سروں میں گاتی ہے

جب سے بخشا ہے تم نے غم مجھ کو

وسعت قلب بڑھتی جاتی ہے

عزم محکم بھی ہو اگر ہم راہ

خیر مقدم کو منزل آتی ہے

جو خودی کو بلند رکھتے ہیں

سر پہ دنیا انہیں بٹھاتی ہے

اس توقع پہ جی رہا ہوں بہارؔ

جیسے اب آرزو بر آتی ہے