chhup ke ruswa hue inkar hai sach baat mein kya

chhup ke rusvā hue inkār hai sach baat meñ kyā

ai sanam lutf hai parde kī mulāqāt meñ kyā

koī andhā hī tujhe maah kahe ai ḳhurshīd

farq hotā nahīñ insān se din raat meñ kyā

yaar ne vāda-e-fardā-e-qayāmat to kiyā

shak hai ai nāla-e-dil terī karāmāt meñ kyā

koī but-ḳhāne ko jaatā hai koī ka.abe ko

phir rahe gabr-o-musalmāñ haiñ tirī ghaat meñ kyā

ek muddat se huuñ saa.il tire darvāze par

bosa yā gaalī milegā mujhe ḳhairāt meñ kyā

aisī ūñchī bhī to dīvār nahīñ ghar kī tire

raat añdherī koī āvegī na barsāt meñ kyā

do ghaḌī kī jo mulāqāt thī vo bhī mauqūf

aisā paḌtā thā ḳhalal yaar kī auqāt meñ kyā

paḌh ke ḳhat aur bhī māyūs hue vasl se ham

yaar ne bhejā safar se hameñ sauġhāt meñ kyā

ātish-e-mast jo mil jaa.e to pūchhūñ us se

tū ne kaifiyyat uThā.ī hai ḳharābāt meñ kyā

chhup ke ruswa hue inkar hai sach baat mein kya

ai sanam lutf hai parde ki mulaqat mein kya

koi andha hi tujhe mah kahe ai KHurshid

farq hota nahin insan se din raat mein kya

yar ne wada-e-farda-e-qayamat to kiya

shak hai ai nala-e-dil teri karamat mein kya

koi but-KHane ko jata hai koi kabe ko

phir rahe gabr-o-musalman hain teri ghat mein kya

ek muddat se hun sail tere darwaze par

bosa ya gali milega mujhe KHairaat mein kya

aisi unchi bhi to diwar nahin ghar ki tere

raat andheri koi aawegi na barsat mein kya

do ghaDi ki jo mulaqat thi wo bhi mauquf

aisa paDta tha KHalal yar ki auqat mein kya

paDh ke KHat aur bhi mayus hue wasl se hum

yar ne bheja safar se hamein saughat mein kya

aatish-e-mast jo mil jae to puchhun us se

tu ne kaifiyyat uThai hai KHarabaat mein kya