jab KHanjar-e-qatil se na inkar hua chup

jab ḳhanjar-e-qātil se na inkār huā chup

āḳhir mire hāthoñ kā talabgār huā chup

shamshīr-e-qalam maut ke bāzār se guzrā

tārīḳh batā.e kahāñ kirdār huā chup

ye dekh ke maidāñ meñ pareshāñ hai sitamgar

maqtūl nahīñ ḳhanjar-e-ḳhūñ-ḳhvār huā chup

us ishq-e-haqīqī kī duā māñgiye bhaa.ī

jo nok-e-sināñ par na sar-e-dār huā chup

kī mimbar-e-lab se jo tabassum meñ ḳhitābat

sajde meñ gire tiir kamāñ-dār huā chup

āñkheñ na huiiñ band kabhī dast-e-ajal se

ye baat alag tālib-e-dīdār huā chup

sayyād ko niiñd aa.e ye mumkin hī kahāñ thā

beḌī na kabhī tauq-e-girāñ-bār huā chup

jab us kā savāl aa gayā tanqīd kī zad meñ

sakte meñ ġhurūr aa gayā darbār huā chup

ma.alūm na thī us ko mire ashkoñ kī nisbat

qīmat jo batā.ī to ḳharīdār huā chup

ashkoñ se kiyā mātam-e-mazlūm sar-e-ām

be-nutq bhī ho kar na azādār huā chup

jab KHanjar-e-qatil se na inkar hua chup

aaKHir mere hathon ka talabgar hua chup

shamshir-e-qalam maut ke bazar se guzra

tariKH batae kahan kirdar hua chup

ye dekh ke maidan mein pareshan hai sitamgar

maqtul nahin KHanjar-e-KHun-KHwar hua chup

us ishq-e-haqiqi ki dua mangiye bhai

jo nok-e-sinan par na sar-e-dar hua chup

ki mimbar-e-lab se jo tabassum mein KHitabat

sajde mein gire tir kaman-dar hua chup

aankhen na huin band kabhi dast-e-ajal se

ye baat alag talib-e-didar hua chup

sayyaad ko nind aae ye mumkin hi kahan tha

beDi na kabhi tauq-e-giran-bar hua chup

jab us ka sawal aa gaya tanqid ki zad mein

sakte mein ghurur aa gaya darbar hua chup

malum na thi us ko mere ashkon ki nisbat

qimat jo batai to KHaridar hua chup

ashkon se kiya matam-e-mazlum sar-e-am

be-nutq bhi ho kar na azadar hua chup