jab KHayal-e-girya-e-paiham hua

jab ḳhayāl-e-girya-e-paiham huā

apne dil kā aur hī aalam huā

vo nahīñ sunte hamāre dil kī baat

shauq-e-arz-e-mudda.ā ab kam huā

jaan nazr-e-āriz-e-tābāñ huī

dil asīr-e-gesu-e-pur-ḳham huā

ashk gir kar dāman-e-mahbūb par

iftiḳhār-e-dīda-e-pur-nam huā

raat guzrī aa ga.ī sub.h-e-firāq

aish kā sāmān ab barham huā

chārāgar mauqa taġhāful kā nahīñ

zaḳhm-e-dil ab qābil-e-marham huā

mere dil kī laash uTThī shaan se

hasratoñ kā dhuum se mātam huā

ban gayā ka.aba vahī dil ke liye

jis jagah sar apnā 'hāmid' ḳham huā

jab KHayal-e-girya-e-paiham hua

apne dil ka aur hi aalam hua

wo nahin sunte hamare dil ki baat

shauq-e-arz-e-muddaa ab kam hua

jaan nazr-e-ariz-e-taban hui

dil asir-e-gesu-e-pur-KHam hua

ashk gir kar daman-e-mahbub par

iftiKHar-e-dida-e-pur-nam hua

raat guzri aa gai subh-e-firaq

aish ka saman ab barham hua

chaaragar mauqa taghaful ka nahin

zaKHm-e-dil ab qabil-e-marham hua

mere dil ki lash uTThi shan se

hasraton ka dhum se matam hua

ban gaya kaba wahi dil ke liye

jis jagah sar apna 'hamid' KHam hua