jab KHayalon mein tumhein pas biThaun aksar

jab ḳhayāloñ meñ tumheñ paas biThā.ūñ aksar

miir ke sher hoñ lab par unheñ gā.ūñ aksar

dafn kar ke sabhī va.adoñ ko jahāñ bichhḌe the

vo shajar dekhne jaatī huuñ maiñ gaañv aksar

maiñ gilā kaise karūñ tum ne mujhe rauñdā hai

apne saa.e pe bhī aa jaatā hai paañv aksar

jab tire ba.ad tirā hijr satā.e mujh ko

tujh ko maiñ yaad karūñ bhuul bhī jā.ūñ aksar

kaisā rishta hai mirā tum se mujhe ilm nahīñ

tum agar rūTho to maiñ ḳhud ko manā.ūñ aksar

merā da.avā hai tujhe chhoḌ diyā hai maiñ ne

phir tirā zikr hī kyuuñ sheroñ meñ lā.ūñ aksar

'āfiya' aa.ina dekhā hī nahīñ muddat se

ḳhud se maiñ ba.ad tire aañkh churā.ūñ aksar

jab KHayalon mein tumhein pas biThaun aksar

mir ke sher hon lab par unhen gaun aksar

dafn kar ke sabhi wadon ko jahan bichhDe the

wo shajar dekhne jati hun main ganw aksar

main gila kaise karun tum ne mujhe raunda hai

apne sae pe bhi aa jata hai panw aksar

jab tere baad tera hijr satae mujh ko

tujh ko main yaad karun bhul bhi jaun aksar

kaisa rishta hai mera tum se mujhe ilm nahin

tum agar ruTho to main KHud ko manaun aksar

mera dawa hai tujhe chhoD diya hai main ne

phir tera zikr hi kyun sheron mein laun aksar

'afiya' aaina dekha hi nahin muddat se

KHud se main baad tere aankh churaun aksar