jab KHizan aai chaman mein sab dagha dene lage

jab ḳhizāñ aa.ī chaman meñ sab daġhā dene lage

tinke uḌā uḌ kar nasheman kā pata dene lage

jab mirī gustāḳhiyoñ kī vo sazā dene lage

vasl kī shab lāt-ghūñsa bhī mazā dene lage

māñjh kar vo dāñtoñ ko jab muskurā dene lage

chhoTī moTī saiñkaḌoñ bijlī girā dene lage

qatl karne ke bajā.e ye sazā dene lage

khod kar gaDDhā mujhe zinda dabā dene lage

be-tahāsha qabr par kisle bajā dene lage

merī miTTī ko Thikāne se lagā dene lage

un ke ik thappaḌ se jab maiñ dam churā kar paḌ gayā

aise ghabrā.e ki dāman se havā dene lage

aap to māñgā kareñ the mere marne kī duā

ab lagā marne to jiine kī duā dene lage

kaisā āshiq aap to mujh ko samajhte haiñ qulī

har jagah hāthoñ meñ mere bistara dene lage

ho gayā majbūr maiñ bhī aur dil-e-nākām bhī

vasl kī shab jab ḳhudā kā vāsta dene lage

kam nahīñ hai torpedo se tire tīr-e-nazar

chhed kar dil aag siine meñ lagā dene lage

mahramoñ se aap ke joban kā uqda khul gayā

aap kī uThtī javānī kā pata dene lage

'būm' honā chāhiye bazm-e-suḳhan meñ vo kalām

dost kyā dushman sadā-e-marhabā dene lage

jab KHizan aai chaman mein sab dagha dene lage

tinke uDa uD kar nasheman ka pata dene lage

jab meri gustaKHiyon ki wo saza dene lage

wasl ki shab lat-ghunsa bhi maza dene lage

manjh kar wo danton ko jab muskura dene lage

chhoTi moTi sainkaDon bijli gira dene lage

qatl karne ke bajae ye saza dene lage

khod kar gaDDha mujhe zinda daba dene lage

be-tahasha qabr par kisle baja dene lage

meri miTTi ko Thikane se laga dene lage

un ke ek thappaD se jab main dam chura kar paD gaya

aise ghabrae ki daman se hawa dene lage

aap to manga karen the mere marne ki dua

ab laga marne to jine ki dua dene lage

kaisa aashiq aap to mujh ko samajhte hain quli

har jagah hathon mein mere bistara dene lage

ho gaya majbur main bhi aur dil-e-nakaam bhi

wasl ki shab jab KHuda ka wasta dene lage

kam nahin hai torpedo se tere tir-e-nazar

chhed kar dil aag sine mein laga dene lage

mahramon se aap ke joban ka uqda khul gaya

aap ki uThti jawani ka pata dene lage

'bum' hona chahiye bazm-e-suKHan mein wo kalam

dost kya dushman sada-e-marhaba dene lage