jab KHizan ke chehre pile ho gae

jab ḳhizāñ ke chehre piile ho ga.e

baaġh ke sab phal rasīle ho ga.e

zikr terā jab chhiḌā jān-e-suḳhan

talḳh lahje bhī surīle ho ga.e

jab chaḌhī us par javānī kī parat

zāviye us ke kaTīle ho ga.e

terī furqat ne ghulā kar rakh diyā

mere sab malbūs Dhīle ho ga.e

'mīr' kā dīvān ghar meñ kyā rakhā

bām-o-dar ashkoñ se giile ho ga.e

chand zarre bad-gumānī ke the jo

nafratoñ ke ab vo Tiile ho ga.e

fāsle jo the hamāre darmiyāñ

qurbatoñ ke ab vasīle ho ga.e

ham ne jo āsāniyoñ ke gul chune

ḳhaar se baḌh kar nukīle ho ga.e

jab KHizan ke chehre pile ho gae

bagh ke sab phal rasile ho gae

zikr tera jab chhiDa jaan-e-suKHan

talKH lahje bhi surile ho gae

jab chaDhi us par jawani ki parat

zawiye us ke kaTile ho gae

teri furqat ne ghula kar rakh diya

mere sab malbus Dhile ho gae

'mir' ka diwan ghar mein kya rakha

baam-o-dar ashkon se gile ho gae

chand zarre bad-gumani ke the jo

nafraton ke ab wo Tile ho gae

fasle jo the hamare darmiyan

qurbaton ke ab wasile ho gae

hum ne jo aasaniyon ke gul chune

KHar se baDh kar nukile ho gae