jab KHud taDap ke wo meri bahon mein aa gae

jab ḳhud taḌap ke vo mirī bāhoñ meñ aa ga.e

sab valvale simaT ke nigāhoñ meñ aa ga.e

baḌhtī ga.iiñ zamāne kī jab sard-mehriyāñ

dil khiñch ke ḳhud ġhamoñ kī panāhoñ meñ aa ga.e

dil phuñk rahā hai siine meñ din-rāt ai ḳhudā

sho.ale kahāñ se ye mirī aahoñ meñ aa ga.e

jitnī bhī shikneñ paḌtī ga.iiñ farq-e-nāz par

itne hī ḳham niyāz kī rāhoñ meñ aa ga.e

kuchh sūjhtā nahīñ hai mujhe ab sivā.e ġham

jab se ki aap merī nigāhoñ meñ aa ga.e

'sāhir' savāb meñ ho kashish kis liye ki jab

saare maze simaT ke gunāhoñ meñ aa ga.e

jab KHud taDap ke wo meri bahon mein aa gae

sab walwale simaT ke nigahon mein aa gae

baDhti gain zamane ki jab sard-mehriyan

dil khinch ke KHud ghamon ki panahon mein aa gae

dil phunk raha hai sine mein din-raat ai KHuda

shoale kahan se ye meri aahon mein aa gae

jitni bhi shiknen paDti gain farq-e-naz par

itne hi KHam niyaz ki rahon mein aa gae

kuchh sujhta nahin hai mujhe ab siwae gham

jab se ki aap meri nigahon mein aa gae

'sahir' sawab mein ho kashish kis liye ki jab

sare maze simaT ke gunahon mein aa gae