جب خدا مہربان ہے پیارے

جب خدا مہربان ہے پیارے

مہرباں کل جہان ہے پیارے

مجھ سے کیوں بد گمان ہے پیارے

تو مرا دل ہے جان ہے پیارے

کیوں مریں ہم کسی کی الفت میں

جان ہے تو جہان ہے پیارے

حالت دل نہ پوچھ اے ہمدم

اک بڑی داستان ہے پیارے

آدمی کا برا بھلا سب کچھ

آدمی کی زبان ہے پیارے

بے نتیجہ ہے آج کل الفت

مفت کی کھینچ تان ہے پیارے

پیار کیسے نہ آئے اردو پر

کیسی پیاری زبان ہے پیارے

سچ ہے بے مایہ کی زمانے میں

کوئی عزت نہ شان ہے پیارے

آخری گھر کی فکر کر اے دل

تو یہاں میہمان ہے پیارے

ہم تمہارے ہیں تم ہمارے ہو

پردہ کیوں درمیان ہے پیارے

بے تکلف رہو مرے دل میں

یہ تمہارا مکان ہے پیارے

کون بڈھوں کو پوچھتا ہے عطاؔ

لاکھ ہمت جوان ہے پیارے