jab KHuda mehrban hai pyare

jab ḳhudā mehrbān hai pyāre

mehrbāñ kul jahān hai pyāre

mujh se kyoñ bad-gumān hai pyāre

tū mirā dil hai jaan hai pyāre

kyoñ mareñ ham kisī kī ulfat meñ

jaan hai to jahān hai pyāre

hālat-e-dil na pūchh ai hamdam

ik baḌī dāstān hai pyāre

aadmī kā burā-bhalā sab kuchh

aadmī kī zabān hai pyāre

be-natīja hai āj-kal ulfat

muft kī khīñch-tān hai pyāre

pyaar kaise na aa.e urdu par

kaisī pyārī zabān hai pyāre

sach hai be-māya kī zamāne meñ

koī izzat na shaan hai pyāre

āḳhirī ghar kī fikr kar ai dil

tū yahāñ mehmān hai pyāre

ham tumhāre haiñ tum hamāre ho

parda kyoñ darmiyān hai pyāre

be-takalluf raho mire dil meñ

ye tumhārā makān hai pyāre

kaun buDDhoñ ko pūchhtā hai 'atā'

laakh himmat javān hai pyāre

jab KHuda mehrban hai pyare

mehrban kul jahan hai pyare

mujh se kyon bad-guman hai pyare

tu mera dil hai jaan hai pyare

kyon maren hum kisi ki ulfat mein

jaan hai to jahan hai pyare

haalat-e-dil na puchh ai hamdam

ek baDi dastan hai pyare

aadmi ka bura-bhala sab kuchh

aadmi ki zaban hai pyare

be-natija hai aaj-kal ulfat

muft ki khinch-tan hai pyare

pyar kaise na aae urdu par

kaisi pyari zaban hai pyare

sach hai be-maya ki zamane mein

koi izzat na shan hai pyare

aaKHiri ghar ki fikr kar ai dil

tu yahan mehman hai pyare

hum tumhaare hain tum hamare ho

parda kyon darmiyan hai pyare

be-takalluf raho mere dil mein

ye tumhaara makan hai pyare

kaun buDDhon ko puchhta hai 'ata'

lakh himmat jawan hai pyare