jab ki manus tha aalam ke girdab se bhi

jab ki mānūs thā ālām ke girdāb se bhī

mil gayā zahr-e-tamasḳhur ka.ī ahbāb se bhī

mere riste hue zaḳhmoñ kā mudāvā na huā

ye shikāyat hai tire shahr ke ādāb se bhī

ab unheñ aañkh kī putlī meñ chhupānā hogā

daaġh jo dhul na sake chashma-e-mahtāb se bhī

koī to zaḳhm mirā sāz-e-takallum chheḌe

koī to baat chale dīda-e-pur-āb se bhī

chashm-e-be-ḳhvāb ke ḳhvāboñ kī jo ta.abīr banā

vahī dikhlā gayā āñkhoñ ko ka.ī ḳhvāb se bhī

merā kyā zikr hai gulshan bhī hai maġhmūm 'ḳhayāl'

ho ga.e aap ḳhafā gosha-e-shādāb se bhī

jab ki manus tha aalam ke girdab se bhi

mil gaya zahr-e-tamasKHur kai ahbab se bhi

mere riste hue zaKHmon ka mudawa na hua

ye shikayat hai tere shahr ke aadab se bhi

ab unhen aankh ki putli mein chhupana hoga

dagh jo dhul na sake chashma-e-mahtab se bhi

koi to zaKHm mera saz-e-takallum chheDe

koi to baat chale dida-e-pur-ab se bhi

chashm-e-be-KHwab ke KHwabon ki jo tabir bana

wahi dikhla gaya aankhon ko kai KHwab se bhi

mera kya zikr hai gulshan bhi hai maghmum 'KHayal'

ho gae aap KHafa gosha-e-shadab se bhi