جب کسی کو منانا پڑتا ہے

جب کسی کو منانا پڑتا ہے

اپنا سب کچھ گنوانا پڑتا ہے

قیس کیسے کوئی بھی کہلائے

دشت میں خاک اڑانا پڑتا ہے

خواب دفنانے پڑتے ہیں اپنے

خود سے جب گھر چلانا پڑتا ہے

کل کو بہتر بنانے کے لیے اب

اپنا ماضی بھلانا پڑتا ہے

چیختی ہے خموشی جب اندر

شور باہر مچانا پڑتا ہے

یوںہی رہ گیر کون کہلائے

رہ سے پتھر ہٹانا پڑتا ہے

کوئی ہمدرد بھی نہیں خود ہی

بوجھ غم کا اٹھانا پڑتا ہے

جب عبادت کی بات ہو راضیؔ

سر وفا میں جھکانا پڑتا ہے