jab kisi shaKHs ne zalim ki taraf-dari ki

jab kisī shaḳhs ne zālim kī taraf-dārī kī

ham bhī galiyoñ meñ nikal aa.e azā-dārī kī

tū jo lauT aayā sabhī jaur-o-jafā bhuul ga.e

ham ne tujh yaar ko dekhā tirī dildārī kī

vaqt-e-ruḳhsat tujhe hañste hue muḌ kar dekhā

ham tire hukm ko maane so adākārī kī

ishq to saare mazāhib se miyāñ aage hai

muftī-e-shahr-e-mohabbat ne sanad jaarī kī

asr-e-hāzir ke taqāzoñ ko nibhānā thā 'farah'

so rivāyat se zarā haT ke ġhazal-kārī kī

jab kisi shaKHs ne zalim ki taraf-dari ki

hum bhi galiyon mein nikal aae aza-dari ki

tu jo lauT aaya sabhi jaur-o-jafa bhul gae

hum ne tujh yar ko dekha teri dildari ki

waqt-e-ruKHsat tujhe hanste hue muD kar dekha

hum tere hukm ko mane so adakari ki

ishq to sare mazahib se miyan aage hai

mufti-e-shahr-e-mohabbat ne sanad jari ki

asr-e-hazir ke taqazon ko nibhana tha 'farah'

so riwayat se zara haT ke ghazal-kari ki