jab koi sina-e-girdab pe ubhra qatra

jab koī sīna-e-girdāb pe ubhrā qatra

yaad aaya dil-e-pur-ḳhūñ ke lahū kā qatra

chaah kar tujh ko bhalā kaise mile merā nishāñ

mil ke sāgar meñ dikhā.ī nahīñ detā qatra

qatre qatre hī kā marhūn hai dariyā kā vajūd

mujh se pūchho to haqīqat meñ hai dariyā qatra

ġham ke dozaḳh meñ ye jal jal ke banā hai kundan

tab kahīñ jā ke mirī aañkh se Tapkā qatra

yuuñ tire naam se rāhat dil-e-muztar ko milī

halq meñ jaise kisī pyāse ke utrā qatra

munhadim kar hī gayā shahr-e-ġharībāñ ke makāñ

barsā hai abr-e-siyah ab ke jo qatra qatra

kis tarah merā adū madd-e-muqābil aa.e

rū-ba-rū 'jān' kahāñ aag ke Thahrā qatra

jab koi sina-e-girdab pe ubhra qatra

yaad aaya dil-e-pur-KHun ke lahu ka qatra

chah kar tujh ko bhala kaise mile mera nishan

mil ke sagar mein dikhai nahin deta qatra

qatre qatre hi ka marhun hai dariya ka wajud

mujh se puchho to haqiqat mein hai dariya qatra

gham ke dozaKH mein ye jal jal ke bana hai kundan

tab kahin ja ke meri aankh se Tapka qatra

yun tere nam se rahat dil-e-muztar ko mili

halq mein jaise kisi pyase ke utra qatra

munhadim kar hi gaya shahr-e-ghariban ke makan

barsa hai abr-e-siyah ab ke jo qatra qatra

kis tarah mera adu madd-e-muqabil aae

ru-ba-ru 'jaan' kahan aag ke Thahra qatra