جب کوچہ کوچہ مقتل ہو تب ذکر گلستاں کیا معنی

جب کوچہ کوچہ مقتل ہو تب ذکر گلستاں کیا معنی

جب آگ میں زندہ جسم جلیں تب جشن بہاراں کیا مانی

مسموم فضا ہر سمت دھواں پرواز کریں طائر کیسے

جب شاخ نشیمن جلتی ہو بلبل ہو غزل خواں کیا معنی

اس قافلے کا لٹنا ٹھہرا قزاق ہو جس کا راہنما

گلچیں ہو جو اپنی فطرت سے گلشن کا نگہباں کیا معنی

جس علم کے زہر سے انساں بھی خونخوار درندے بن جائیں

اس امن و اماں کی بستی میں وہ علم فراواں کیا معنی

جس کا مسلک ہو نسل کشی جس کا مقصد قتل و غارت

وہ آدمی ہندو کیا مطلب وہ مرد مسلماں کیا معنی

اس کرۂ ارض پہ لکھا ہے مظلومیٔ آدم کا قصہ

ہاں چھین جھپٹ کی تہذیبیں آزادیٔ انساں کیا معنی