jab mai-e-lala-fam hoti hai

jab mai-e-lāla-fām hotī hai

mujh ko tauba harām hotī hai

ḳhūb-rū vo hai jis kī ḳhū achchhī

sham.a sūrat-harām hotī hai

ye sunā hai ki barhaman se bhī

shaiḳh kī raam raam hotī hai

terā va.ada hai kis qayāmat kā

raat din sub.h-o-shām hotī hai

hijr kā din Dhale to ham jāneñ

sub.h ke baa'd shaam hotī hai

pahle ai 'dāġh' kuchh na hosh aaya

dil kī ab rok-thām hotī hai

jab mai-e-lala-fam hoti hai

mujh ko tauba haram hoti hai

KHub-ru wo hai jis ki KHu achchhi

shama surat-haram hoti hai

ye suna hai ki barhaman se bhi

shaiKH ki ram ram hoti hai

tera wada hai kis qayamat ka

raat din subh-o-sham hoti hai

hijr ka din Dhale to hum jaanen

subh ke ba'd sham hoti hai

pahle ai 'dagh' kuchh na hosh aaya

dil ki ab rok-tham hoti hai