jab mere shahr ke din-raat suhane honge

jab mire shahr ke din-rāt suhāne hoñge

vaqt kab aa.egā kab aise zamāne hoñge

aaj ke daur meñ jiine kī agar zid hai tumheñ

zindagī ke na.e ādāb banāne hoñge

sirf is shart pe baḳhshī ga.iiñ nīñdeñ mujh ko

jāgtī āñkhoñ meñ kuchh ḳhvāb sajāne hoñge

bhaa.ī ne bhaa.ī ke zaḳhmoñ pe davā rakhī thī

aaj kī baat na kar pichhle zamāne hoñge

zinda rakhnā hai agar zauq-e-shajar-kārī tumheñ

peḌ pathrīlī zamīñ par bhī lagāne hoñge

jaane kis ruḳh se tumheñ apnā samajh le duniyā

apne chehre pe ka.ī chehre chaḌhāne hoñge

ham ne badlī na ravish apnī to sun lo 'shahzar'

apne hī tīroñ ke ham aap nishāne hoñge

jab mere shahr ke din-raat suhane honge

waqt kab aaega kab aise zamane honge

aaj ke daur mein jine ki agar zid hai tumhein

zindagi ke nae aadab banane honge

sirf is shart pe baKHshi gain ninden mujh ko

jagti aankhon mein kuchh KHwab sajaane honge

bhai ne bhai ke zaKHmon pe dawa rakhi thi

aaj ki baat na kar pichhle zamane honge

zinda rakhna hai agar zauq-e-shajar-kari tumhein

peD pathrili zamin par bhi lagane honge

jaane kis ruKH se tumhein apna samajh le duniya

apne chehre pe kai chehre chaDhane honge

hum ne badli na rawish apni to sun lo 'shahzar'

apne hi tiron ke hum aap nishane honge