jab mere shahr-e-mohabbat mein wo aa jaega

jab mire shahr-e-mohabbat meñ vo aa jā.egā

dil meñ jazboñ kī na.ī jot jagā jā.egā

apne allāh pe har lamha bharosa rakkho

ġham kā tūfān bahar-hāl chalā jā.egā

jis ne paiġhām mohabbat kā diyā duniyā ko

saare 'ālam kā vo mahbūb kahā jā.egā

har ġhalat baat kī tash.hīr na ho pā.egī

sach bahar-hāl sar-e-'ām kahā jā.egā

chand lamhoñ kī mulāqāt kā manzar mat pūchh

kyā ḳhabar thī vo mire dil meñ samā jā.egā

hosh uḌ jā.egā baḌh jā.egī dil kī dhaḌkan

yak-ba-yak jab vo tire sāmne aa jā.egā

tīrgī-e-ġham-e-daurāñ se na ghabrā 'nāzir'

ye añdherā bhī bahut jald chalā jā.egā

jab mere shahr-e-mohabbat mein wo aa jaega

dil mein jazbon ki nai jot jaga jaega

apne allah pe har lamha bharosa rakkho

gham ka tufan bahar-haal chala jaega

jis ne paigham mohabbat ka diya duniya ko

sare 'alam ka wo mahbub kaha jaega

har ghalat baat ki tashhir na ho paegi

sach bahar-haal sar-e-'am kaha jaega

chand lamhon ki mulaqat ka manzar mat puchh

kya KHabar thi wo mere dil mein sama jaega

hosh uD jaega baDh jaegi dil ki dhaDkan

yak-ba-yak jab wo tere samne aa jaega

tirgi-e-gham-e-dauran se na ghabra 'nazir'

ye andhera bhi bahut jald chala jaega