jab meri samt hasin yaadon ke patthar barse

jab mirī samt hasīñ yādoñ ke patthar barse

ḳhair-maqdam ko chale ashk bhī chashm-e-tar se

yuuñ koī shīsh-mahal kar gayā dil kā vīrāñ

jis tarah chal de koī ruuTh ke apne ghar se

dil meñ yuuñ zehn se dar aatī hai yād-e-māzī

ghar meñ jis tarah se utre koī ziine par se

dil ko iz.hār-e-tamannā kī tamanna thī bahut

lab magar hil na sake ahl-e-jahāñ ke Dar se

tark-e-ulfat kā koī radd-e-amal to dekhe

bolnā chhoḌ diyā maiñ ne zamāne bhar se

dil meñ muddat se mohabbat kī hai jhankār na guuñj

laao is shīshe ko Takrā.eñ kisī patthar se

aaj tak mujh ko bulātī haiñ sadā.eñ us kī

jis ne lauTāyā thā ik din mujhe apne dar se

ye mohabbat kī sazā jaan hī le le na 'zafar'

ham to ik umr se sūrat ko bhī us kī tarse

jab meri samt hasin yaadon ke patthar barse

KHair-maqdam ko chale ashk bhi chashm-e-tar se

yun koi shish-mahal kar gaya dil ka viran

jis tarah chal de koi ruTh ke apne ghar se

dil mein yun zehn se dar aati hai yaad-e-mazi

ghar mein jis tarah se utre koi zine par se

dil ko izhaar-e-tamanna ki tamanna thi bahut

lab magar hil na sake ahl-e-jahan ke Dar se

tark-e-ulfat ka koi radd-e-amal to dekhe

bolna chhoD diya main ne zamane bhar se

dil mein muddat se mohabbat ki hai jhankar na gunj

lao is shishe ko Takraen kisi patthar se

aaj tak mujh ko bulati hain sadaen us ki

jis ne lauTaya tha ek din mujhe apne dar se

ye mohabbat ki saza jaan hi le le na 'zafar'

hum to ek umr se surat ko bhi us ki tarse