jab mujhe gardish-e-dauran ka KHayal aata hai

jab mujhe gardish-e-daurāñ kā ḳhayāl aatā hai

daf.atan umr-e-gurezāñ kā ḳhayāl aatā hai

dast-e-vahshat mirā majbūr nahīñ hai lekin

ismat-e-jaib-o-garebāñ kā ḳhayāl aatā hai

kyā batā.ūñ tujhe ai mahv-e-nashāt-o-ishrat

kyoñ mujhe shām-e-ġharībāñ kā ḳhayāl aatā hai

husn-e-ġhārat-gar-e-tamkīñ se ye kah de koī

phir mujhe chāk-e-garebāñ kā ḳhayāl aatā hai

aur baḌhtī hai matā.a-e-ġham-e-dil kī qīmat

jab ilāj-e-dil-e-sozāñ kā ḳhayāl aatā hai

aa ke ruk jaatī haiñ aaheñ mire lab tak 'sāqib'

jab mujhe husn-e-pashemāñ kā ḳhayāl aatā hai

jab mujhe gardish-e-dauran ka KHayal aata hai

dafatan umr-e-gurezan ka KHayal aata hai

dast-e-wahshat mera majbur nahin hai lekin

ismat-e-jaib-o-gareban ka KHayal aata hai

kya bataun tujhe ai mahw-e-nashat-o-ishrat

kyon mujhe sham-e-ghariban ka KHayal aata hai

husn-e-ghaarat-gar-e-tamkin se ye kah de koi

phir mujhe chaak-e-gareban ka KHayal aata hai

aur baDhti hai mataa-e-gham-e-dil ki qimat

jab ilaj-e-dil-e-sozan ka KHayal aata hai

aa ke ruk jati hain aahen mere lab tak 'saqib'

jab mujhe husn-e-pasheman ka KHayal aata hai