jab na tha ishq ye azab na tha

jab na thā ishq ye azaab na thā

ātish-e-ġham se dil kabāb na thā

jin dinoñ ġhair bāryāb na thā

maiñ vahāñ maurid-e-itāb na thā

jab ki vo umr the shabāb na thā

ye naqāb aur ye hijāb na thā

vo ḳhafā ho ke ho ga.e ḳhāmosh

yā mirī baat kā javāb na thā

na rahā dil paḌī jo us pe nigāh

mauj ke aate hī habāb na thā

tere jāñ-bāz kī dilerī vaah

tah-e-ḳhanjar bhī iztirāb na thā

ḳhair guzrī jo mohtasib aaya

sāmne sāġhar-e-sharāb na thā

soz-e-ġham dūd-e-āh sail-e-sarishk

hijr meñ kaun sā azaab na thā

lab-e-dariyā thā sair ke qābil

kyā mirā dīda-e-pur-āb na thā

dil meñ thā valvaloñ kā josh-o-ḳharosh

ek tūfān thā shabāb na thā

aaj hī kyā nayā hai soz-e-jigar

kyā kaleja mirā kabāb na thā

sair ko nikle vo jo ġhair ke saath

kaun sā fitna ham-rikāb na thā

kyā sañbhaltā bigaḌ kar apnā haal

kuchh zamāne kā inqalāb na thā

us kī mahfil meñ shab ko sab the 'ḳhayāl'

sirf ik maiñ hī bāryāb na thā

jab na tha ishq ye azab na tha

aatish-e-gham se dil kabab na tha

jin dinon ghair baryab na tha

main wahan maurid-e-itab na tha

jab ki wo umr the shabab na tha

ye naqab aur ye hijab na tha

wo KHafa ho ke ho gae KHamosh

ya meri baat ka jawab na tha

na raha dil paDi jo us pe nigah

mauj ke aate hi habab na tha

tere jaan-baz ki dileri wah

tah-e-KHanjar bhi iztirab na tha

KHair guzri jo mohtasib aaya

samne saghar-e-sharab na tha

soz-e-gham dud-e-ah sail-e-sarishk

hijr mein kaun sa azab na tha

lab-e-dariya tha sair ke qabil

kya mera dida-e-pur-ab na tha

dil mein tha walwalon ka josh-o-KHarosh

ek tufan tha shabab na tha

aaj hi kya naya hai soz-e-jigar

kya kaleja mera kabab na tha

sair ko nikle wo jo ghair ke sath

kaun sa fitna ham-rikab na tha

kya sanbhalta bigaD kar apna haal

kuchh zamane ka inqalab na tha

us ki mahfil mein shab ko sab the 'KHayal'

sirf ek main hi baryab na tha