jab os bund bund giri saeban se

jab os buuñd buuñd girī sā.ebān se

ḳhushbū sī ik uḌī mire kachche makān se

tū sāhiloñ pe jis kā nishāñ DhūñDhtā phirā

rishta to us ne joḌ liyā bādbān se

nā-qadrī-e-hunar kī mujhe taab hī na thī

maiñ ne ḳhud apnī jins uThā lī dukān se

thī us kī hī lahū kī sadā jo palaT ga.ī

us ne to jhāñk kar bhī na dekhā makān se

bikhrī huī thiiñ chāroñ taraf nā-rasā.iyāñ

vo pāTne chalā thā ḳhalā ko uḌaan se

kyā kyā huiiñ qubūl duā.eñ us ek shab

phir ek phuul bhī na girā āsmān se

garmī meñ Tin kī chhat ne jalāyā kuchh aur bhī

jaaḌe meñ barf sar pe girī sā.ebān se

rezoñ meñ baT gayā huuñ maiñ 'shāhīn' har taraf

pahchān le mujhe mire bikhre nishān se

jab os bund bund giri saeban se

KHushbu si ek uDi mere kachche makan se

tu sahilon pe jis ka nishan DhunDhta phira

rishta to us ne joD liya baadban se

na-qadri-e-hunar ki mujhe tab hi na thi

main ne KHud apni jins uTha li dukan se

thi us ki hi lahu ki sada jo palaT gai

us ne to jhank kar bhi na dekha makan se

bikhri hui thin chaaron taraf na-rasaiyan

wo paTne chala tha KHala ko uDan se

kya kya huin qubul duaen us ek shab

phir ek phul bhi na gira aasman se

garmi mein Tin ki chhat ne jalaya kuchh aur bhi

jaDe mein barf sar pe giri saeban se

rezon mein baT gaya hun main 'shahin' har taraf

pahchan le mujhe mere bikhre nishan se