jab parda-e-majaz haqiqat-numa bana

jab parda-e-majāz haqīqat-numā banā

har zarra apnī apnī jagah aa.ina banā

rif.at meñ ḳhāk-e-dair-o-haram se sivā banā

vo āstāñ jo qibla-e-ahl-e-vafā banā

naġhma bahār abr shafaq phuul chāñdnī

sab jam.a ho ga.e to sarāpā tirā banā

sunte hī chauñk chauñk uThe ahl-e-kārvāñ

naala ye kis kā thā jo sadā-e-darā banā

uljhā huā hai mas.ala-e-zindagī meñ ishq

ik dard-e-sar ye ban ke rahā aur kyā banā

dil chal paḌā thā rāh-e-mohabbat meñ be-dareġh

manzil tak us ġharīb kā kyā jaane kyā banā

kyā baat hai ki ishq ko rakhte haiñ log naam

ye ishq hī to hāsil-e-har-mudda.ā banā

ai jaur-e-dost terī ināyat kā shukriya

jo dard tū ne baḳhsh diyā vo davā banā

ta.amīr kar rahe the ḳhayāloñ kā ham mahal

apnā hī ghar bigāḌ liyā aur kyā banā

allah re mo.ajiza dil-e-āshiq ke ḳhuun kā

hāthoñ tak un ke jaate hī rang-e-hinā banā

vo vasvasa jo dil meñ uThā avval-e-safar

kāñTā qadam qadam pe vahī raah kā banā

vāmāñdgī-e-āshiq-e-māyūs al-amān

baiThā huā hai raah meñ ik naqsh-e-pā banā

'muslim' jhukā.e jā ke kahāñ gardan-e-niyāz

har but ba-zom-e-ḳhvesh hai goyā ḳhudā banā

jab parda-e-majaz haqiqat-numa bana

har zarra apni apni jagah aaina bana

rifat mein KHak-e-dair-o-haram se siwa bana

wo aastan jo qibla-e-ahl-e-wafa bana

naghma bahaar abr shafaq phul chandni

sab jama ho gae to sarapa tera bana

sunte hi chaunk chaunk uThe ahl-e-karwan

nala ye kis ka tha jo sada-e-dara bana

uljha hua hai masala-e-zindagi mein ishq

ek dard-e-sar ye ban ke raha aur kya bana

dil chal paDa tha rah-e-mohabbat mein be-daregh

manzil tak us gharib ka kya jaane kya bana

kya baat hai ki ishq ko rakhte hain log nam

ye ishq hi to hasil-e-har-muddaa bana

ai jaur-e-dost teri inayat ka shukriya

jo dard tu ne baKHsh diya wo dawa bana

tamir kar rahe the KHayalon ka hum mahal

apna hi ghar bigaD liya aur kya bana

allah re moajiza dil-e-ashiq ke KHun ka

hathon tak un ke jate hi rang-e-hina bana

wo waswasa jo dil mein uTha awwal-e-safar

kanTa qadam qadam pe wahi rah ka bana

wamandgi-e-ashiq-e-mayus al-aman

baiTha hua hai rah mein ek naqsh-e-pa bana

'muslim' jhukae ja ke kahan gardan-e-niyaz

har but ba-zom-e-KHwesh hai goya KHuda bana